Ma tahay suurtogal in la dhiso (App) ama degel internet oo dhammaystiran adiga oo isticmaalaya qalabka AI oo keliya, xitaa haddii aad tahay programmer? Jawaabtu waa maya.
Sababtu waxay tahay, xitaa haddii aad fahmi karto koodka ama aad leedahay khibrad farsamo, intaas kuma filna. Waxaan rabaa inaad si fiican u fahamto qodobkan: ha ii keenin tusaalooyin bogag fudud oo lagu dhisay dhowr prompt oo keliya. Waxaan halkan ka hadlaynaa codsi leh kakanaan dhab ah (real complexity), oo u adkeysan kara kumanaan isticmaale, ilaalin kara xogtooda, isla markaana diyaar u ah inuu koro oo ballaarto. Tani waxay u baahan tahay qof si qoto dheer u fahansan waxa uu dhisayo, xitaa haddii uu isticmaalayo qalabka AI.
Muhiimadda Qorshaynta iyo System Architecture
Haddii aan la helin qorshe cad iyo qaab-dhismeed nidaam (System Architecture) oo ku dhisan fahamka baahiyaha iyo socodka xogta (data flow) bilowga hore, suurtogal ma aha in wax weyn la dhiso. Waxaad gaari doontaa heer aad rabto inaad ku darto sifo cusub ama aad horumariso qayb ka mid ah nidaamka, ka dibna waxaad la kulmi doontaa qas iyo is-khilaaf kugu qasbi doona inaad wax walba bilowga ka soo celiso. Mar kasta oo aad isku daydo, waxaad dib ugu soo laaban doontaa isla halkii, sababtoo ah bilowgii ayaanad fahamsanayn sidii nidaamkan loo dhisi lahaa.
Tusaale dhab ah oo dhacay
Saaxiibkay ayaa ila wadaagay sheekadan: Shirkad cusub (Startup) ayaa bilowday madal lagu qabsado ballamah (Booking Platform). Si degdeg ah ayay wax walba ugu kaydiyeen hal miis (table) oo keliya: Macmiilka + Adeegga + Qiimaha + Heerka (Status).
Markii ay gaareen 10,000 oo isticmaale, waxay ogaadeen dhibaatooyin waaweyn:
Markii ay beddeleen qiimaha adeegga, waxaa isbeddelay xisaabaadkii hore ee macaamiishii hore u iibsaday!
Aqoonsiga macaamiisha ayaa isku dhex jiray; maadaama aan xogta macmiilka laga soocni adeegga, hal macmiil ayaa dhowr jeer ku soo laabtay diiwaanno kala duwan, ballamihiina way lumeen.
Markii la rabay in lagu daro sifooyinka 'baajinta' (Cancellation) iyo 'lacag celinta' (Refund), waxay ogaadeen inuusan jirin miis u gaar ah lacag bixinta, ma jiro
transaction_id, mana jiro hab lagu raad-raaco xaaladaha lacag celinta.Culeyska awgiis, madashii waxay noqotay mid aad u gaabis ah sababtoo ah waxay ku tiirsanaayeen qoraallo (text) halkii ay isticmaali lahaayeen aqoonsiyo (IDs), mana jirin wax fihris ah (indexes).
Ugu dambayn, waxay ku qasbaadeen inay dib u qaabeeyaan wax walba: miisas kala duwan, xiriirro cad, Snapshot-ka qiimaha ee xilliga dalabka, iyo diiwaanka isbeddelada.
Gunaanad
Sababtaas awgeed, xitaa haddii aad tahay programmer, haddii aadan lahayn aragti cad iyo faham qoto dheer oo ku saabsan naqshadaynta nidaamka (System Architecture) iyo socodka xogta, waad fashilmi doontaa.
Maqaalkan asalkiisu wuxuu ku qornaa af-Carabi, waxaana qoray Ammar Jasim (عمار جاسم), annaga ayaana u turjunnay akhristayaasha Hobaydi.